من ديوان الشعر الحسَّاني : شعار السلام عليكَ يا رسولَ الله..

كايل محدِّ حيْ == افْ كاف آنَ ملاهْ
 السَّلامُ عليــــــ == ـــكَ يا رسولَ اللهْ

1 - يا ربِّ لك الحمد == ألِّ بيك اموحَّدْ
أُ نشهد عن محمَّد == انبيك الدين ارعاه
 أ عنّ بلَّغ نشهد == ذَ الِّ مرسول امعاه

2 - افْ لِسْلاَمْ السَّلامْ == شعار أهل لِسلامْ
و أعلَ سيِّدْ لنامْ == المسلم لاَ شِفناه
 سَلَّمْ ذَ ما يلتامْ ==غريبَ لاَ لِمْنَاهْ !

3- انسَلَّمْ فالصَّلْواتْ == جَالسْ فالتَّحِيَّاتْ
أَعْلِيهْ آنَ مرَّاتْ == تعرف ذاك اشوساهْ
 كانْ المسلم لاَ ماتْ == وُ أسوَّلْ ما ينساهْ

4 - أُ نشهد من كبْلْ الموتْ == أُ يِخلِكْ بالموت الفَوْتْ
و اتعود الناس اجْفُوتْ == عنُّ رحمَ للْ جاهْ
 أُ عنُّ غوثْ الْ لَخُوتْ == أُ عنُّ عظيمُ الجاهْ

5- أَعْلِيهْ أَلَّ صَلَّ == فاتْ المَوْلَ جَلَّ
أُ فاتُ لِملوكْ أَلَّ == صلاَّوْ أُ ذاكْ اكفاهْ
 أُ فِصْلاتْ أَهل المِلَّ == لمْرْ أَثْرُ كَاعْ اخْفَاهْ ؟!

6- نُعَمَّرْ فالطَّاعَ == و اندوْرْ الشفاعَ
أُ فيَّ ما يُراعَ == شِ شينْ اللهْ اجراهْ
 أُ ذَاكْ النَّظَرْ ساعَ == أَفْوِجْهْ اللهْ ٱنْرَاهْ

7 - أ داير للوالدين == زاد اصْلاح الدارين
هومَ و المسلمين == طالبْ ذاك الْ لِلاَهْ
أ قرتْ زاد العينين == امخلِّ ذيكْ أَعْلاهْ ؟!

8 - اللهمَّ صلِّ == زاد أعليه املِّ
أُ لصحاب أُ لهْلِّ ألِّ == فيهمْ سرُّ خلاَّه
 ذاك السر إغلِّ == و إعلِّ مَخَلاَّه

9- صلِّ كِدْ المَرَّاتْ == فالكَوْنْ امْنْ الذرَّاتْ
أُ كَدُّ فالمسرَّاتْ == فالدنيَ نِتْحَرَّاهْ
أُ فاخِرتِ ذاكْ الْ راتْ == لِمَّ مِنْ فَوْكْ انْرَاهْ

10 -أ كِدْ أَلِّ مِنْ مَرَّ == فِالْكَونْ ٱمْنْ الذرَّ
سلَّمْ و المعَرَّ ==كدُّ عنِّ مُراهْ
 هي و المضرّ == اتَّم ابعيدْ أُراهْ

11 - والْ محمدْ محمودْ == المقام الْمحمودْ
أَلِّ موعود إِعودْ == يالربْ ٱمْن امعاطاهْ
 يَالْتَوْفَ بالوُعُودْ == أ فتْ أُعدْتْ ابْ معطاهْ

12 - ذَ الشعار ابْ لسرارْ == و ابْ لنوارْ ابْتِكَارْ
و ابتكارْ الشِّعَارْ == مُلاه الْ ذَ مزَّاهْ
 من لسرار أُ لنوارْ == يجبر كَد التِّنزاه

أُ كايل مَحَدِّ حيْ == افْ كَافْ آنَ مُلاَهْ
أَلسَّلاَمُ عَلَيْـــ ==  ــكَ يا رسولَ اللهْ