الوحدة الوطنية ..مورتانِ حدْ اتخممْ ..
عود إلى موضوع الوحدة الوطنية..
19 . 1 . 2018 م
مُورتانِ حد اتخمَّمْ == سيان كَانْ ٱفْيَمْ الهَمْ
شعبُ و إدور إتَمْ افْ يَمْ == زادْ الهم اف مورتان
سيَّانِ و ٱنْكِدْ ٱنْعَمَّمْ == و ٱنْخَصَّصْ ذاكْ أَلِّ عَانِ
سيانِ كَوْرِ فيهْ إِتَمْ == أُ بظانِ فيهْ أُ سيَّانِ
سِرْغِلاَّوِ كَاعْ افْمُورِ == تانِ هو و البظانِ
و الحَرْطَانِ و التَّكْرُورِ == و الْوُلْفَاوِ و الْفُلاَّنِ !
عشنَ سابكْ لسلام أَيامْ == لختلاف ألِّ فين دَامْ
و ألاَّ جانَ لسلامْ أُكَامْ == ٱمكَانِ مَاهُ متْحانِ
ذَ الشَّعْبْ أَعْلَ لِسلامْ العامْ == أُكَامْ الشعْبْ أَعْلَ ذَ هَانِ
أُ مِتْكَانِ و إدوَّرْ لِسْلامْ == إِتَمْ أَلاَّ زَادْ ٱمْكَانِ
سِرْغِلاَّوِ كَاعْ افْمُورِ == تانِ هو و البظانِ
و الحَرْطَانِ و التَّكْرُورِ == و الْوُلْفَاوِ و الْفُلاَّنِ !
هِيَّ مُورتَانْ أَلاَّ عَيْنْ == فِيهَ ذَاكْ التِّشْكَالْ الزَّيْنْ
لَوْنَيْنْ أُلاَ فِيهُمْ لَثْنَيْنْ == ٱلْ صايِبْ عن ذَاكْ الثَّانِ
أُ لا فيهم واحد للعَيْنِينْ == للشَّوفَ عن لَوْخَرْ غَانِ
أُلاهمْ فيهم بَرَّانيِّينْ == أُ ذَ كيفتْ عنْ ما بَرَّانِ
سِرْغِلاَّوِ كَاعْ افْمُورِ == تانِ هو و البظانِ
و الحَرْطَانِ و التَّكْرُورِ == و الْوُلْفَاوِ و الْفُلاَّنِ !
ٱكلام ٱمْنْ المَعْنَ خَاوِ == أُ مَارِكْ حَدْ ٱرْوَاهْ الرَّاوِ
حدْ إكَولْ ٱنْ سِرْغِلاَّوِ == أُ بِظَانِ وَلَّ حَرْطَانِ
أُ تَكْرُورِ ولَّ وُلْفَاوِ == أُ فُلاَّنِ عَنْ فيهمْ دَانِ.
و الشَّعْبْ أَكْدَادْ أُ مِسَّاوِ == مَاهْ أَلاَّ حَدُّ مِدَّانِ
سِرْغِلاَّوِ كَاعْ افْمُورِ == تانِ هو و البظانِ
و الحَرْطَانِ و التَّكْرُورِ == و الْوُلْفَاوِ و الْفُلاَّنِ !
رحم الله السلف و بارك في الخلف.
Commentaires
Enregistrer un commentaire