من ديوان الشعر الحساني: أعرف عنك ما تيت اسغير ...

رمضانيات:
توجيه و اعتبار
28 ابريل 2020 ..

تطلاعْ گافْ لأخي الأديب الأريب عبدُ ولد أحمد يوره :

قال عبدُ :

أقوالكْ وأفعالك لذاك
عس اعليهم هوم مظبوط
ذاك الْ منهمْ مظبوط و ذاك
ألِّ منهم ماهُ مظبوط !!

و قلتُ مطلعاً :

أعرفْ عنَّكْ ما تيتْ اسغيرْ
يانَ و أَرْعَ حسن التدبيرْ
فلِّ مزالْ امْنْ اتباتيرْ
گدَّامكْ و أوفَ منْ ذِ إِقُوطْ
ولَّ ما زادْ إقوطْ أُ سيرْ
سيْرْ امكمَّلْ فيهْ الشروطْ :
من ظرك أشرط فعلكْ بالخيرْ
أُ بالخيْرْ إتَمْ ألاَّ مشروطْ
و أربط قولكْ بالخير أخيرْ
بالخير إتمْ ألاَّ مربوطْ
و أعرفْ عنْ من عدلْ القديرْ
بفعالكْ و أقوالكْ محيوطْ
أ تگطعْ كل انهارْ افْ مسيرْ
شوطْ اكبيرْ أُ راصكْ مربوطْ
أ تگطعْ كل ليلَ شوط اكبيرْ
افْ مسيرْ افْ وُجْهَكْ ممغوطْ
و اتْدَبَّرْ كيفْ ألِّ فالعيرْ
و النَّفيرْ أَصْلْ انت ممروطْ
و اتظلْ اتشوطْ افْ ذاكْ السَّيْرْ
و اتباتْ اتشوطْ أُ تگْطَعْ  شوطْ!

أقوالكْ وأفعالك لذاك
عس اعليهم هوم مظبوط
ذاك الْ منهمْ مظبوط و ذاك
ألِّ منهم ماهُ مظبوط !!

رحم الله السلف و بارك في الخلف.