الجديد في أدبيات العيد ..

 

الجديد في أدبيات العيد ..

الجمعة 2 شوالْ 1442 هجرية.

 

دراعتْ ملگَ ذيكيَّ

ؤ تمسيكَ ذيكِ عليَّ

ؤ شاة املِّ عيدْ اضحيَّ

ماهِ بالمنَّ منيوشَ

هاذُ فخلاگِ لكْ هيّ

لخلاگْ افرجلكْ مفلوشَ

ؤ خاترْ لك عن ذوكْ اغْوَيَّ

ما تگدرْ بيهَ تُحَوْشَ

ؤتعگبْ تعرف عنه ساعَ

لعادتْ ماهِ منفوش

تنحازْ افْ قيمتْ درَّاعَ

ؤ قيمتْ بوشْ امْنْ المسكْ ؤوشَ!

محمد بن أحمد بن الميداح "دمبَ" :

الدراعَ و البوشْ ابعيدْ

فيَّ مگَرِّتْهمْ و أكيدْ

لجاتْ امعاهم شاة العيد

اتعود القصَّ متروش

و امنين إِفُوتْ إعودْ افليْدْ

عندي ذ كامل مغروشَ

ران نگْبِلْ ذيك الساعَ

شِ بيهَ اصَّ ما نُحوْشَ

ؤُ يِنحازْ افْ قيمتْ درَّاعَ

ؤ قيمتْ بوشْ امْنْ المسكْ ؤوشَ!

 

Mohamed Heddar

معط تمسيكه عليّ

أُدراعه زينه ذيكيّ

أُمع معط شاة اضحيّ

مگرتهم ما تُحوشه

أُحد اضعف من لادميّ

عن ذاك، الدنيَ منفوشه

غير اعط وقاتَ تلاد

امن آخر نگشه منگوشه

ما تفگع حد اسو لعاد

أشين صنعه من لمشوشه

Mohameden Ould Sidi Bedena

ادخلْ بينْ أخوتْ امْن الهيْهْ

خُ ثالثْ مجلسنَ يِلهيهْ

ؤ يلهينَ فيهْ امنينْ إجيهْ

فيهْ اعيارتنَ مفلوشَ

بالموزون الزين الْ ما فيهْ

لفظْ ألا معنَ يُحوشَ

ؤ يگدرْ فالعيدْ اگبللْ مفاتْ

يرسلْ مزال انَّ حَوْشَ

من شيات اتجِ گَمْ اعياتْ

من ذيك اجِّيهَ محيوش !