اگطاعْ مع دمبَ بن أحمد بن الميدَّاح..
الجمعة 2 شوالْ 1442 هجرية.
دراعتْ ملگَ ذيكيَّ
ؤ تمسيكَ ذيكِ عليَّ
ؤ شاة املِّ عيدْ احذيَّ
ماهِ بالمنَّ منيوشَ
هاذُ فخلاگِ لكْ هيّ
لخلاگْ افرجلكْ مفلوشَ
ؤ خاترْ لك عن ذوكْ اغْوَيَّ
ما تگدرْ بيهَ تُحَوْشَ
ؤتعگبْ تعرف عنه ساعَ
لعادتْ ماهِ منفوش
تنحازْ افْ قيمتْ درَّاعَ
ؤ قيمتْ بوشْ امْنْ المِسْكْ ؤوشَ!
محمد بن أحمد بن الميداح "دمبَ" :
الدراعَ و البوشْ ابعيدْ
فيَّ مگَرِّتْهمْ و أكيدْ
لجاتْ امعاهم شاة العيد
اتعود القصَّ متروش
و امنين إِفُوتْ إعودْ افليْدْ
عندي ذ كامل مغروشَ
ران نگْبِلْ ذيك الساعَ
ذ الْ بيهَ آنَ ما نُحوْشَ
ؤُ يِنحازْ افْ قيمتْ درَّاعَ
ؤ قيمتْ بوشْ امْنْ المسكْ ؤوشَ!
محمد ولد هدَّارْ :
معط تمسيكَ عليَّّ
أُدراعَ زينَ ذيكيَّ
أُمع معط شاة اضحيَّ
مگرتهمْ ما تُحَوْشَ
أُحد اضعِفْ من لادميّ
عن ذاك.. الدنيَ منفوشَ
غير اعط وقاتَ تلادْ
امن آخر نگشَ منگوشَ
ما تفگع حد اسو لعادْ
أشين صنعَ من لمشوشَ!
قلت في جواب محمدْ ولد هدَّارْ :
ادخلْ بينْ أخوتْ امْن الهيْهْ
خُ ثالثْ مجلسنَ يِلهيهْ
ؤ يلهينَ فيهْ امنينْ إجيهْ
فيهْ اعيارتنَ مفلوشَ
بالموزون الزين الْ ما فيهْ
لفظْ ألا معنَ يُحوشَ
ؤ يگدرْ فالعيدْ اگبللْ مفاتْ
يرسلْ مزال انَّ حَوْشَ
من شيَّاتْ اتجِ هونْ اعياتْ
من ذيك اجِّيهَ مَحْيُوشَ !
رحم الله السلف وبارك في الخلَف .
Commentaires
Enregistrer un commentaire