من ديوان الشعر الحسَّاني: نصيحة للمدونين من ناصح أمين..

رمضانيات :

نصيحة للمدونين من ناصح أمين ..

تلطفْ بينَ يا عربينَ 

وكْتِنْ فاتْ الدهر أعلينَ

افْ تدوينَ كلْ أَزْمِينَ

أُ تعليقْ أُ فوكالْ  أُ ذَ طالْ

فيهْ الدهر أُلاَ يِخْطِينَ

كون إلعاد الْ رِيزُ قالْ

تبارك الله اعييْنَ

نعطُ دهْرْ اطويلْ ابذِ الحالْ !

أُ يوخظْ هاذَ زَادْ أيْدينَ

كاملْ من لقوالْ أُ لفعالْ

كيفِتْ - يلِّ يحسنْ فينَ -

حدْ  انسَ عن فَمْ السؤال

عنْ ذَ ألِّ  گالْ افْ افتدوينَ

أ تعليقْ أ فوكالْ أ مزالْ

حدْ ألاَّ يسوَّلْ مَنْغَدْ

عنْ ذَ ألِّ فالتدوينَ گالْ

أُ عنْ ذَ ألِّ گالْ املِّ حَدْ

فالتعليقْ أُ گالْ افْ فوكالْ !!

يلِّ توكلْ عرض الصديقْ

أُ فالتدوينْ اتگولْ الموبِيقْ

أ فالتَّعْليقْ الْ ما گَاعْ إليقْ 

أ فالفوكالْ ألِّ زادْ اثْقَالْ

و اتجِ للصديقْ أعْلَ الريقْ

و ادوَّنْ و اتعلقْ فالحالْ

و اتسجلْ شِ ماهُ دقيقْ

افْ فوكالْ أطرحْ لحتمالْ

گبلْ أعليكْ المجالْ إضيقْ

عنْ لا طالْ الدهرْ أُ ما طالْ

يعگبْ حدْ أُ ذَ بيه إثيقْ

عنْ ذَ ألِّ گالْ ألاَّ يُسالْ

 افْ تدوينَ ولَّ تعليقْ

أ فوكالْ ألاَّ بعْدْ المآلْ

حدْ ألاَّ يسوَّلْ مَنْغَدْ

عنْ ذَ ألِّ فالتدوينَ گالْ

أُ عنْ ذَ ألِّ گالْ املِّ حَدْ

فالتعليقْ أُ گالْ افْ فوكالْ !!

حدْ ابطبعُ ذاكُوَّ زينْ

ولَّ ذاكوَّ طبعُ شيْنْ

هاذَ يفاصلْ فالتدوينْ

و التعليقْ أ فوكالْ افصالْ

لوَّلْ منهمْ  گَولُ حسينْ

افْ تدوينْ أ تعليقْ انگالْ

و افْ فُوكالْ أ ينظالْ امنينْ

يخلگْ شِ شيْنْ أمنُّ ذالْ

و الثانِ گولُ شينْ إليْنْ

افْ تدوينْ أُ تعليقْ أُقَالْ

وافْ فوكالْ أسجَّلْ و امنينْ

يخلگ شِ شيْنْ أثرُ ينظالْ ؟

ما يِنْظالْ إدوَّن بيْدَيْنْ

و إعلّقْ بيديْنْ أسجّالْ

إسجّل بيْديه اثِّنتَيْنْ

فوكالْ ابْ لَفْظْ امتينْ أزالْ

ألا يرعَ فالكذبْ التبْيِين

ينشرْ شِ لا سمعُ منشالْ

أ رازنْ فعْراضْ المسلمينْ

أُ منْ لعراضْ ارفدْ گاعْ الحالْ

 أثرُ عنهَ ما ردُّ دِينْ

أ لاَ طرفتْ لُ لمروَّ بالْ

و ابلاَ  زاد أخلاقْ امسيْكِينْ

و اشهودُ ماهمْ باطْ اگلالْ

 اشهودْ اتعُودْ الملايينْ 

امْعَ الگوْلْ أُ لفعالْ اگْپَالْ

شاهدتُ عينْ اتْدِگْ افْ عيْنْ

زاد افوسايلْ لتِّصالْ

و المدونين ألاَّ بيْنْ

هاذُ لثنيْنْ ابذَ التِّفصالْ

و الملايينْ أَعْلَ  يقينْ

واحد تشهد لُ بالتعدالْ

وتشهد زادْ الْ لَوْخَرْ فالحينْ

بالتعدالْ املِّ بالفالْ

ذاكْ امْنْ الطبعْ الطبعْ امتينْ

أ فعلْ الشخص أَعْلَ طبعُ دالْ

أُ مولْ الطبْعْ  الشيْنْ المبينْ

لا ما ستُرُ سِتْرُ محالْ

ألاَ ينساوْ المدونينْ

عن تدوينْ أُ تعليقْ اسهالْ

أ تسجيل الْفوكالْ الْ هيينْ

من شِ زينْ أُ شينْ افمنوالْ

يعگبْ فمنيْنْ إفوتْ ازمينْ

يطوالْ أُ يِگدِرْ ما يطوالْ

حدْ ألاَّ يسوَّلْ مَنْغَدْ

عنْ ذَ ألِّ فالتدوينَ گالْ

أُ عنْ ذَ ألِّ گالْ املِّ حَدْ

فالتعليقْ أُ گالْ افْ فوكالْ !!

أشهد أن لاَ إلهَ إلاَّ الله و أشهد أنَّ محمداً رسول الله صلَّى الله عليه و سلَّمْ.

رحم الله السلف و بارك في الخلف.